總之這事我也是聽來的。我的意思是，很可能不是真事。如果可不要信，寧死都不要信……

　　事發於下午兩點。X君板臉、抿嘴，邁着剛勁的步伐朝警署走去。穿黑色背心外套的他鈕扣沒扣，可見藍色恤衫包裹着繃緊胸肌。他在馬路前停步，取出iPhone，再三確認當值時間：是朝九晚六沒錯。兩點零七分，X君抵達警署。他在辦公桌前雙手抱頭，紋絲不動。同袍在身後呼嘯往來，有人整理文件，有人審問疑犯，沒誰看他一眼。

　　「唉！」突然他大聲叫喊，語調像唱戲的人說「嗚呼」。「邊個偷咗雪櫃嗰個大—西—瓜！」

　　白粉友抬起頭來。「阿sir。」「唔得閒！」「係咪有人問，邊個偷咗雪櫃嗰個大西瓜？」「你hi嘢hi懵咗啊，使唔使我寫埋落簿？」「唔使，我都聽唔到。」

　　「嘩！」叫聲又起。「家明偷咗雪櫃嗰個大—西—瓜！」

　　白粉友瞥眼警員名牌，上面寫道「陳家明」。「阿sir，係咪有西瓜？」家明說：「今日拉咗成擔人，阿sir好忙。」

　　「俊賢偷咗雪櫃嗰個大—西—瓜！」「永勤偷咗雪櫃嗰個大—西—瓜！」X君又喊了好幾個名字，直至手機響起。他執起手機，移步走廊，三分鐘後返回，逕直往警長房間走去。「士沙。今日有單大嘢。」他說。

　　「返番出去！」「唔係呢，有人偷咗雪櫃嗰個大西瓜。」「我畀你啲file執好未呀？」「店舖盜竊，係嚴重罪行，切勿以身試法。」「返出去！」「士沙偷咗雪櫃嗰個大—西—瓜！」「頂，你黐夠未呀。」「士沙，你唔可以問我黐夠未，醫生證明我已經康復，你咁講我可以告你歧視。」「得得得，我係擔心你可能有啲唔舒服。你鍾意點就點啦，但唔好阻住我，好唔好？」

　　X君離開警署時認真考慮今天是否做過頭。關鍵是要取平衡：既不足以被炒，又不需用心工作。「也許明天應該執file。」他想。「誰叫孩子今天生日嘛。」

　　所以我說這只是個故事，讀者切勿模仿……