圖：深水埔街坊福利事務促進會於初一至初三再次舉辦新春美食墟市，預期吸引五萬至六萬入場人次/大公報記者 徐曉彤攝

　　就嚟又到新年，留港度歲嘅市民當然去趁下墟，感受下過年嘅熱鬧氣氛喇！深水埔街坊福利事務促進會（街坊會）就喺初一至初三（下月16日至18日）再次喺楓樹街遊樂場舉辦新春美食墟市，場內攤檔增至16個，今年墟市檔戶首次准以明火煮食，更首次引入三架美食車停泊場外，為市民提供多元化嘅美食，街坊會仲會派發約50000蚊嘅墟市美食券，明益街坊！

　　呢個墟市而家招募緊檔主，檔主唔使交場租之餘，水電都係由大會供應，實在好適合有意創業嘅青年人試試身手。街坊會理事長梁鉅海話，今年攤檔會交由三類檔主使用，包括關顧基層、具地區特色嘅小店，而為咗鼓勵青年創業，仲特設18歲至30歲青年嘅申請組別，三類攤檔各佔三分一。申請截止日期係下周六（20日），有興趣嘅朋友記住交申請表。

　　關注墟市發展召集人兼深水埗區議員鄭泳舜話，過去收到有墟市檔主反映希望可以用明火煮食，增加提供食物嘅選擇，而今年已獲食環署初步確認，容許檔主用Gas爐煮食，而場內亦會做好消防設備。香港美食車聯盟召集人林瑞華就話，今次係美食車首次停泊街邊營運，期望開拓本地市場，令更多市民認識美食車。