圖：香港中華文化總會武術委員會及香港與內地投資商務促進會武術委員會，共派出六隊代表參與武術表演
香港功夫世界知名，最近香港搞咗個「武林大會」你又知唔知？伍聲嗰日一去到呢個武林大會，就見到場館入面不論男女老幼，都着曬武術服飾，場內雲集各門各派52隊武術團隊，成千位高手齊齊上台切磋武藝，果然係高手在民間，原來呢個武林大會係博愛醫院同香港中國國術龍獅總會合辦嘅活動，大家一齊以武會友之餘，活動仲成功籌咗超過100萬元善款，香港武林果然好有愛！
表演多元 觀眾大飽眼福
呢個「博愛武林大會2018」就係喺旺角麥花臣場館舉行，博愛醫院丁酉年董事局主席彭少衍當日都有現身支持，佢話呢個武林大會唔止係個籌募活動，仲係推廣中國武術的一個媒介，所以博愛醫院好榮幸可以同香港中國國術龍獅總會合辦是次活動，一起弘揚中國武術，鼓勵全民運動。
活動當日有多個武術團體表演多套唔同門派嘅太極拳，仲有唔同類型嘅中國傳統兵器嘅示範，例如太極扇、匕首等，伍聲同好多獲發免費門票入場嘅市民一樣都睇到好興奮。
另外大會仲請到北少林龍子祥國術總會表演夜光龍、貓頭鷹藝術團大跳肚皮舞，入場觀眾簡直係大飽眼福。
