圖：林振永（右二）致送紀念狀予表演嘉賓
香港有唔少人都係粵曲發燒友，隨口都可以唱到兩句，有見及此，九龍城區各界慶祝香港回歸祖國活動委員會（委員會）、香港九龍城工商業聯會、九龍城區居民聯會就喺早前舉辦咗個「慶祝香港回歸祖國20周年 粵曲、折子戲欣賞會」，免費邀請逾400位街坊一齊欣賞。
委員會執行副主席林振永致辭嘅時候就話，粵曲同粵劇喺香港都非常受歡迎，所以大會就特意喺辭舊迎新嘅12月，為粵曲和粵劇愛好者舉辦一場樂韻舞動同折子戲嘅欣賞活動。佢又話，西九戲曲中心將於明年開幕，中心有可以容納1100個座位嘅粵劇劇場，到時大家可以喺嗰度感受更豐富嘅戲曲文化，而中心作為西九文化區首個落成啟用嘅表演藝術場地，足以證明政府同社會大眾對粵劇發展嘅支持同期盼。
活動當晚仲有中聯辦九龍工作部副處長王林暢、九龍城區議會主席潘國華、九龍城民政事務助理專員蘇銥靜、警務處九龍城區助理警民關係主任龐永豪蒞臨主禮。
