圖：香港福建希望工程基金會日前舉行「楊自然、楊自順、吳天墅、劉輝峰、余毅獎學金」頒獎典禮，賓主合影留念
要培育子女成材，家長真係一啲唔慳得，又要買補充練習，仲要畀錢去補習，好在有「香港福建希望工程基金會」（基金會）嘅一班善長捐咗100萬元，設立「楊自然、楊自順、吳天墅、劉輝峰、余毅獎學金」，幫輕下啲家長，呢個獎學金有40間中學，共200位學生受惠，獲獎學生每人會有5000蚊嘅獎學金，大會日前搞咗個頒獎典禮，咁多間中學嘅同學仔走埋一齊攞獎，場面真係熱鬧。
頒獎禮當日，教育局副局長蔡若蓮同中聯辦教育科技部副部長劉建豐都有嚟為獲獎同學仔打打氣。基金會主席余毅就話，自己都好重視仔女嘅教育，當然仔女讀書有好成績，都係靠佢哋自己努力所得，希望透過呢個獎學金，鼓勵學生勤力啲讀書，同時回饋香港社會。他致辭時更形容一眾得獎學生就好似朝早八、九點嘅太陽，充滿朝氣，鼓勵佢哋要不斷進取學習。
今次獎學金係由基金會副主席楊自順贊助30萬元，上屆主席楊自然、主席余毅、副主席吳天墅各贊助20萬元，仲有嚟自廣州嘅善長劉輝峰贊助一萬美元。
