圖：唐英年喺展覽開幕式上為遇難同胞獻上白花

　　今年是南京大屠殺80周年，為咗令港人銘記這段歷史，帶出珍惜友愛和平的信息，香港江蘇社團總會會長唐英年帶領多個本港江蘇社團籌辦的「共同見證─南京大屠殺史實展」，日前舉行開幕式，唐英年致辭時話，希望青年人可以珍視當下、不忘過去，以史為鑒，面向未來，共同為人類和平作出貢獻。

　　開幕式當日，中聯辦社團聯絡部副部長黎寶忠、香港南京總會會長王建陵、侵華日軍南京大屠殺遇難同胞紀念館副研究館員張國松、江蘇青年總會會長趙式明、香港澳門南京青年聯合會會長牟翔等都有出席主禮，為遇難同胞獻上白花同默哀。王建陵致辭時話，希望展覽令更多年輕人熟知呢場無法磨滅慘絕人寰的戰爭，從而明白現時安穩幸福嘅生活係用先輩們嘅鮮血換番嚟，和平幸福得之不易，更應珍惜。

　　唐英年之後仲同伍聲分享話，自己身為江蘇人對呢段歷史有特別深嘅感受，當年有家人身處南京附近嘅無錫同常州，而佢嘅媽媽尤淑圻當年仲讀緊交通大學，受戰火影響要多次遷校，打仗無嘢食之餘，仲成日都擔心性命安全，媽媽呢段經歷，都教識佢要珍惜和平。佢又話，對展覽裏面已故嘅南京大屠殺幸存者李秀英嘅一張相好有印象，又指佢嘅名言「要記住歷史，不要記住仇恨。」正正係今次展覽嘅目的。

　　展覽喺香港江蘇社團總會永久會址舉行，由13日至下周三（20日）免費開放畀市民參觀，展出近200張歷史照片、文字資料和視頻資料。