圖：小朋友喺「藥材舖」學用傳統秤砣量出一兩陳皮

　　咦，做咩上環多咗咁多舊式米舖、辦館、藥材舖嘅？原來中西區區議會同中區、西營盤、西環、摩星嶺四區街坊福利會，一連兩個星期日喺上環文化廣場，舉行「秋冬上環假日行人坊暨中西區百業慶回歸」活動，特登喺度重現當區舊街道、舊式舖頭，畀小朋友體驗上一代嘅生活，成年人回憶童年歲月，老友記緬懷昔日風光日子。

　　大人細路齊齊「打卡」

　　搭叮叮來到呢度嘅話，第一眼一定會見到招牌「時光隧道」，原來呢啲招牌全部都係「中上環名店」，不過，就唔係賣時裝嘅，而係消失咗嘅老店，好似係「中央冰室」、「高陞老餅家」、「得男茶室」、「皇后戲院」等，唔少老友記睇住展板同招牌，回味昔日嘅生活，而大人細路就邊睇邊「打卡」。

　　玩咗一輪，伍聲就覺得呢度係「訓練港孩生活技能嘅少林寺」，因為化身懷舊舖頭嘅攤位，個個都有遊戲玩，例如喺米舖學洗米煮飯、藥材舖學用手秤中藥材，仲有攤位畀大家學晾衫，相信小朋友一定獲益良多。伍聲都「極速」學識咗用鹹水草「紮嘢」嘅技藝，原來都幾易上手㗎，綁一圈，轉三兩轉，收返個尾，咁就搞掂，以後陪阿媽買餸都可以「一草走天涯」，年中都慳返唔少膠袋呀！

　　唔單止咁，現場仲有攤位畀大家發揮小宇宙，學整一對獨一無二嘅手繪白飯魚，將舊衫改造成散子包等，絕對啱曬一家大細來邊玩邊學生活小技巧，整嚇親子手作仔。玩到口乾唔緊要，大家每玩完一個攤位遊戲，都會得到一張「代用紙幣」，三張飛就可換到一杯由「金茶王」沖出來嘅奶茶，或者用三張飛「辦年貨」，換一份瓜子糖果。呢個咁正嘅活動，嚟緊星期日（17日）中午12點到下午5點半會再搞，大家記得把握機會啦！