圖：老友記個個都揸住部手機四圍影，務求可拍攝合心水作品
伍聲最近見到張相，一大班老友記拎住智能手機周圍影，唔通佢哋都鍾意「相機食先」？原來，呢班老友記都係參加咗由深水埔街坊福利事務促進會搞嘅「欣賞香港」智能手機攝影班。
呢個攝影班喺半個月前已經開始，免費教500位老友記用手機影相，再教埋佢哋用WhatsApp、微信等通訊軟件，確保佢哋影完相都識同親朋戚友「開心些牙」。伍聲聽聞，個個老友記上堂時都好多嘢問，完全唔捨得落堂，搞到經常要「加時」。街坊會仲帶咗老友記去香港唔同景點「實戰」，例如去西九龍文化區海濱長廊，嚟緊仲會去九龍城寨公園、啟德郵輪碼頭等，老友記之後仲要精挑細選三張傑作出來比賽。
街坊會理事長梁鉅海話，好多老友記成日問街坊會同事，點樣用智能手機，所以就啟發佢搞呢個別開生面嘅班，希望老友記都跟上潮流，融入兒孫話題之中，拉近三代人嘅距離。海哥話，雖然呢個班已經「爆曬棚」，不過，有興趣嘅長者都可以報名，街坊會都會繼續搞手機班，等更多老友記可以「活出精彩人生。」
