圖：身為活動嘉賓嘅商務及經濟發展局副局長陳百里（左）尋日都唔輸蝕，試食咗1++韓牛\大公報記者徐曉彤攝

　　今個星期日有咩好玩？識玩一定係去香港中華總商會（中總）搞嘅「一帶一路繽FUN遊」，場內匯聚「一帶一路」沿線多國嘅特色美食，有韓牛免費試食，仲可以用優惠價試飲全球最貴咖啡「野生麝香貓咖啡」，除此之外，場內仲有互動體驗區，透過VR裝置，市民立即恍如置身瑞士阿爾卑斯山同蘇黎世美景之中，實行有得食，有得玩！

　　呢個一連三日嘅大型嘉年華尋日已經喺中環遮打花園開幕，商務及經濟發展局局長邱騰華、外交部駐香港特派員公署副特派員楊義瑞，同埋中聯辦協調部副部長郭亨斌都有嚟活動主禮，開幕禮仲安排咗約20個身穿唔同國家服飾嘅小朋友，陪同一眾主禮嘉賓上台，真有心思。

　　中總會長蔡冠深就話，希望呢個活動可以畀大家輕鬆體驗「一帶一路」各地特色同埋風土民情。

　　話說尋日伍聲一去到，就聞到陣陣香味，原來係韓牛呀！攤位負責人就講明只送不賣，每日都會準備400份韓牛，分別喺四個時段免費派發，仲要係最高頂級嘅1++韓牛，睇見都流口水。食到口渴嘅話，仲可以去飲來自印尼嘅野生麝香貓咖啡，攤位負責人介紹，呢款咖啡全球每年只產出幾百斤，100克都要過千蚊，今次只係用50蚊就可以飲返杯，真係要試試！