圖：香港．佛山節每日都有功夫表演，尋日由佛山南海一班「少年黃飛鴻」打頭陣，個個武藝精湛\大公報記者陳才逸攝

　　長沙灣尋日出現咗一班「少年黃飛鴻」，個個身懷十八般武藝，耍出拳拳到肉嘅蔡李佛拳、虎鶴雙形拳、鷹爪羅漢拳，仲有南棍、刀劍等武術表演，精彩到個個觀眾拍爛手掌，唔講仲以為自己返咗高手雲集嘅武術之鄉佛山。原來呢度搞緊第二屆香港．佛山節，每日都有三四場功夫表演，輪流由佛山五區嘅高手獻技。

　　今次佛山節係由香港佛山社團總會同佛山海外聯誼會主辦，由一號開始一連四日喺長沙灣遊樂場舉行，啱曬一家大細周末來「食、玩、睇、學」，感受佛山文化。現場有好多平靚正嘅嘢食，伍聲就推介大家來到一定要試下出面唔係度度有得食、連「舌尖」都報道過嘅「均安蒸豬」，啱啱蒸起嗰陣真係香氣逼人，引曬成班師奶過來爭住買。豬肉食起來略帶鹹香，肥肉絲毫不膩，好味到連伍聲都一口氣食咗十幾件！其他順德美食好似墨魚餅、魚皮餃、艾糍都係賣廿蚊份，夠曬大件夾抵食。

　　會場另一邊有八個攤位，展出好多佛山非遺文化手藝，有佛山獅頭、剪紙、彩燈等，好多都畀市民親身體驗。伍聲見到喺廣繡技師耐心指導下，兩個「零經驗」嘅婆婆都好快上手，佢哋仲話想繼續學唔同針法添，真係活到老學到老啊！

　　行行下覺得攰點算好？大會真係夠曬貼心呀！搵咗佛山蔡李佛傳人親臨會場，用「功夫推拿」幫大家「鬆一鬆」，相信成日腰酸背痛嘅打工仔到時一定疲勞盡消。不過伍聲尋日去到仲未見到佢哋開檔，無緣試下佢嘅手勢啦。