吳永嘉希望今年可以繼續到場，支持廠商會青委扒龍舟。
大公網5月24日訊 端午節就嚟到，香港唔少公司、團體以至專業人士組織都鍾意派出自己所屬嘅龍舟隊，鄭晴我就無扒過龍舟，不過工業界立法會議員吳永嘉（Jimmy）就有試過，廿幾年前！
Jimmy話佢自己當年廿幾歲，啱啱出嚟做嘢，唔太記得當年用咩身份參加扒龍舟，估計可能係代表香港律師會出戰，但有一樣嘢佢記得好清楚，就係當年用咗六個星期日練扒龍舟，扒到腰酸背痛，之後佢就無再落場扒喇。
唔參加比賽都有好多方法參與嘅，Jimmy過去幾年都有去睇廠商會青委嘅龍舟賽事，為佢地打打氣。Jimmy講起青委比賽時講得眉飛色舞，不過今年由於有立法會議員身份，端午節當日有其他活動要出席，所以未必去到睇比賽，要盡力爭取嚇。
