鍾意揸車嘅人大都相似，追求片刻嘅寧靜，並不在乎車嘅大細。先前，在SUZUKI做咗二十四年嘅明哥話SWIFT出咗第四代，要帶我去山頂花園遊車河、影相。明哥開着人稱「辣椒仔」SWIFT小紅車，在北角兜埋我。長情嘅佢講起當初入行：「除了鍾意車和駕駛之外，自己冇咩興趣，一做就是二十幾年。」睇SWIFT車身嬌小，內座都算闊落，整體乘坐感頗為舒適，後座膝部空間依舊充裕，並不會有壓迫或局促感。
馬己仙峽道至山頂道，大家都知彎位斜路有幾多，加上雙向道路又窄，SWIFT可以講係靈活轉身，交足功課。從起步到中後段再加速表現皆令人滿意，不僅輕快順暢，加速推力更係飽滿帶勁，因此無論在市區通勤或在山路都好夠用，上山路爬坡都無氣虛，十分明快。
明哥話，SWIFT普通版日常家用夠曬，港幣十六萬幾就有交易，是小家庭平時兩公婆二人世界或帶埋細路出遊嘅佳選。第四代嘅尾門係新設計嘅隱藏上掀式，車身線條更流暢。Sport版偏跑車化，深受愛玩車嘅男士歡迎。
回程路上，下起小雨，又遇上落班高峰塞車，明哥照樣談笑風生。揸車，聽下歌，人都放鬆點，這大概係駕駛嘅樂趣吧。
