圖：「第五屆半邊天女青年精英培育計劃」日前舉行簡介會
成日都話：「女性能撐半邊天」，特別喺香港就有好多女性係社會上嘅精英，而為咗培育香港女性，擴闊佢哋嘅視野，香港各界婦女聯合協進會（香港婦協）舉辦為期半年嘅「第五屆半邊天女青年精英培育計劃」畀參加學員了解國家「一帶一路」建設，同埋「粵港澳大灣區」發展，又會帶學員考察多間大灣區龍頭企業同認識前海規劃等，今年計劃仲特別為完成計劃嘅學員提供唔同類型嘅實習機會，計劃已經開始招募學員，名額只有100個，各位姊妹們仲唔快啲報名！
計劃將於今年三月至七月舉行，學員除咗返內地考察以外，主辦單位仲邀請咗著名講者剖析該區最新發展，而為咗配合政府推動創新科技，計劃亦會安排學員到訪麻省理工創意中心及香港科技園內企業，了解本地創意產業嘅發展。
今年計劃亦會特別為完成計劃嘅學員喺金融、創科、創意等嘅上市公司同國際性組織裏面，獲取工作實踐與事業發展嘅機會。
計劃參加者必須係20至45歲女性，具大專或以上學歷程度，申請者要喺本月25日前填妥並遞交報名表格同有關文件，大會將安排進行面試同甄選，成功獲選嘅參加者需繳付1000元參加費用。計劃詳情可以瀏覽香港婦協網頁（www.hkfw.org）了解，或致電2833 6131查詢。
