圖：參加咗「音樂無界限義教計劃」嘅一班小朋友喺平安夜同市民報佳音
伍聲喺平安夜路過尖沙咀，見到30幾個小朋友吹住色士風、彈住結他同街上市民報佳音，引嚟唔少市民圍觀，原來呢班小朋友就係參加咗由新家園協會、香港菁英會同埋音樂堂慈善基金會聯合主辦嘅「音樂無界限義教計劃」，免費學習色士風同埋結他。音樂堂慈善基金會主席暨香港菁英會社會民生研究會主席高松傑就話，呢個計劃明年就會擴展到荃灣、元朗同天水圍三區，希望可以令更多基層小朋友受惠。
高松傑同伍聲分享話，呢個計劃已經搞咗兩年，服務對象係4歲至12歲嘅基層小朋友，至今有超過200個小朋友受惠。佢話，而家嘅家長都鍾意幫小朋友報名參加興趣班，有利小朋友搵學校，佢哋唔想基層小朋友被人睇低一線，所以就透過呢個計劃去義教，亦都會帶小朋友四圍去義演。有興趣報名嘅朋友，可以喺佢哋嘅facebook「音樂堂慈善基金會」了解詳情。
音樂堂慈善基金會嚟緊喺除夕當日仲會搞一個「全城共奏正能量：最多人學習色士風創世界紀錄」活動，當日亦會有30位基層小朋友同殘疾人士參加，目標集合超過200人學習色士風，創造「最多人學習色士風」的世界紀錄，查詢詳情可致電2380 7321。
