圖：自閉症潛水治療公益組織「心潛」創始人岑澤榮（左）話希望未來治療可標準化，針對唔同患者的情況，學員冬冬（右）
唔少家長都可能對自閉症嘅仔女束手無策，或者覺得做唔同嘅治療對佢哋幫助唔大，之不過，伍聲最近就留意到「估佢唔到」嘅方法可以幫到患者，就係「潛水治療」啦！
自閉症潛水治療公益組織「心潛」（Diving For Humanity）嘅創始人岑澤榮（Winston）話，佢學潛水嗰陣，聽到個教練成功教曉兩個患有自閉症嘅仔仔學識潛水，平衡、控制能力同埋情緒都大有改善，於是喺舊年開始利用「潛水治療」，至今幫到十五個自閉症患者。
Winston話有患者由最初都唔敢落水，之後慢慢愛上潛水，喺水底接受一系列嘅訓練，改善到記憶、社交能力等。佢舉例，有位學員以前畀家長逼極都唔肯寫字，但喺水底世界呢個「寧靜減壓艙」，佢就完全放鬆到自己，第一次喺水底就可以寫到百幾字！佢希望「潛水治療」幫到患者由水底轉至正常環境，都做得到呢啲以前「不可能嘅任務」。
聽講組織搵到贊助，家長都唔使擔心學費昂貴。有興趣嘅可以上www.divingforhumanity.org了解多啲「潛水治療」。
