圖：第二屆香港潮州節於本月六至十日在中環遮打花園舉行
第二屆香港潮州節今日開鑼，大家一連五日都可以去到中環遮打花園感受呢股「冬日中嘅熱潮」。
伍聲就聽聞香港潮屬社團總會為大家集合最「潮」嘅嘢，除咗「大騷」潮州人喺香江打拚嘅歷史同昔日嘅傳統行業，例如係線面，代寫書信，塑膠業，米舖，雜貨舖，銀行等，仲搵來20個曾奪世界機器人大賽冠軍、來自潮州韓山師範學院嘅體感機械人「空降」中環表演，真係夠曬「潮」啊！
來到潮州節相信大家「打個冷」都飽曬，因為現場有好多來自潮州嘅好嘢食，例如係由手瓜起嘅大漢打成嘅潮州牛丸，夠曬結實彈牙，有粒粒金黃、外脆內軟、香氣四溢嘅粿品，仲有用料十足、渾圓光潔、鮮彈爽滑嘅魚丸，當然唔少得味道特別濃郁嘅澄海滷獅頭鵝啦。
潮州節期間仲會有好多精彩表演，例如係扮「駿馬奔騰」嘅布馬舞、帶來好意頭嘅鯉魚舞、名人廚房、潮人唱潮歌、雜技等，啱曬一家大細來做「潮人」。
