大公網7月31日訊 行政長官林鄭月娥（林太）今晚同財政司司長陳茂波、五位局長一齊出席工總第58屆會員周年大會晚宴，佢話由咁多位主要官員陪佢一齊出席，就證明特區政府對工總工作嘅認同、支持，亦反映政府特別重視團隊精神。
林鄭帶同一司五局長到工總晚宴（大公報記者林少權攝）
林太之後逐一介紹每位局長，商務及經濟發展局局長邱騰華將專責「一帶一路」商機發展；政制及內地事務局局長聶德權雖然「政制方面可以休息下」，不過內地事務就要急起直追，因為佢負責推動粵港澳大灣區嘅工作。至於創新及科技發展局局長楊偉雄，林太話指出創科喺工業發展相當重要，所以往後楊偉雄會同大家緊密合作。
林太之後又講笑，話同樣係女性嘅食物及衞生局局長陳肇始「令我唔好咁孤單」，但其實佢負責食物安全同醫療設備，都會受惠於最新工業同科技發展。最後林太介紹埋保安局局長李家超，再次大放笑彈，話開頭都「搲曬頭」諗唔到佢嚟做乜，但最後諗到：「佢嚟呢度話畀大家聽，佢可以確保廣深港高鐵可以『一地兩檢』開通！」一講完，全場掌聲持續十秒，證明大家都好想「一地兩檢」快啲落實！
