大公網7月21日訊 商務及經濟發展局局長邱騰華今日應邀出席書展分享會同年青人對話，之後再喺書展同佢地行咗一陣。邱騰華話自己每年都會抽時間去書展，就算收工之後夜晚10點、11點左右都會抽時間去，不過平時由於工作太忙，想睇書都唔容易，所以要趁住兩個時間睇書，分別就係公幹時搭飛機嘅時候睇，佢大部分嘅書都係呢個時候睇。而另一個時間就係星期日朝早起身之後睇，仲話朝早睇有一個好處，就係無咁易「恰眼訓」喇。

　　另外，邱騰華仲有好得意嘅個習慣，佢通常剪完頭髮都會去行書店，而且透露自己每兩、三星期就要剪一次頭髮，所以每兩、三個星期就會行一次髮廊附近嘅書局。邱騰華話自己一向鍾意行書局，特別係佢讀書時候嘅樓上書店，有種「好文青、大隱隱於市」嘅感覺。

　　邱騰華之後又向年青人推介咗兩本書，分別係由一位患末期肺癌嘅醫生，喺離世前寫，分享自己人生觀嘅自傳《When Breath Becomes Air》，同埋由作家Malcolm Gladwell撰寫的《David and Goliath: Underdogs, Misfits, and the Art of Battling Giants》，話呢本書以大衛同巨人哥利亞之戰，分析說明人人能力唔同，世間上並無所謂必勝策略，反而做好準備、有勇氣去挑戰同埋唔怕壓力先係致勝關鍵。

　　邱騰華介紹完書之後，就同年青人一齊行書展，更加買咗青協攤位一本有關一帶一路同一本關於背包客嘅書走，果然係一位愛書之人。