蔣麗芸嘅爸爸已經九十幾歲，依然好有活力！
大公網5月1日訊 康文署一直都提倡「日日運動身體好，男女老幼做得到」，而且年紀大更加需要做，做開運動嘅長者體能會好好多，鄭晴有時去康文署健身室都會見到高齡長者做器械操練，保持活力同關節靈活。
好似民建聯立法會議員蔣麗芸（Ann姐）尋日就喺網上分享蔣爸爸做運動嘅故事，話說蔣爸爸啱啱做運動踩完單車機，Ann姐見到就關心嚇佢，問爸爸攰唔攰，蔣爸爸於是答佢：「老了。」
Ann姐聽到爸爸咁講，緊係愛父心切，立即答佢：「你不老，不老。」點知呢個時候，蔣爸爸竟然望住部單車機話：「不是我老，是這腳踏車舊了，老了！」場面溫馨之餘，九十幾歲嘅蔣爸爸踩完單車機都唔攰，真係要畀佢一個叻！
