大公網3月15日訊 尋晚係七大電子媒體特首選舉電視論壇，候選人林鄭月娥一向「好打得」，表現自然得心應手，而胡國興胡官雖然睇得出好努力，但始終體能上無咁好，中間表現眼瞓都好正常。至於曾俊華？尋晚佢咪勁無禮貌又熄人咪又發脾氣，黑面黑足全場囉。
鄭晴睇完論壇後立即收到讀者爆料，自稱退休公務員嘅黃小姐話，佢兩三年前已經見識過曾俊華黑面神嘅本色。黃小姐當時喺電視見到曾俊華夫婦出席賽馬活動頒獎，騎頭馬嘅騎師想送花畀曾太，不過曾太自己無留意到。呢個時候，黃小姐就見到曾俊華立即露出黑面，再推太太接花。黃小姐話，曾俊華不嬲鍾意黑面嘅性格當刻真係表露無遺，而且曾俊華成日話自己做嘢好有安排，不過當日就連收個花都安排得唔好！
計我話，黑面神明明日日愛黑面，但選舉期間出席活動、去論壇都笑到四萬咁口，呢啲變色龍一樣嘅公關伎倆唔係人人都做得到。大家平時仲聽佢團隊講成日話佢夠真誠，真係要小心啲，唔好咁易畀佢呃到呀。
