大公網12月22日訊（記者周禮希）尋日係冬至，所謂「做冬大過年」，冬至最重要就係同屋企人一齊過，仲要食湯圓，象徵大家團團圓圓。民建聯主席李慧琼（Starry）尋日就喺社交網站祝大家冬至快樂，佢又話，家庭嘅溫暖是世界上任何一個地方都搵唔到嘅，祝福大家尋晚同家人有一個溫暖愉快嘅冬至。
唔知係咪因為咁，尋日下晝Starry同前民主黨主席劉慧卿（卿姐）做節目傾偈時，Starry都邀請卿姐組團一齊返鄉下！
Starry同卿姐本來喺節目度，講開中央已經畀反對派未有回鄉証嘅人申請回鄉証返內地，Starry就問卿姐申請咗未，又話大家都係同鄉，不如約埋其他同鄉嘅立法會議員一齊返鄉下睇嚇。
不過卿姐就話未申請，而且其實林健鋒都其實已經問咗佢三、四年，話一齊返鄉嚇食飯。卿姐最後都係話遲啲先，如果申請咗會再搵Starry。聽佢地講，原來除咗佢地，葉劉淑儀、曾蔭權都係南海嘅同鄉，如果計埋佛山，仲可以搵埋梁君彥嚟。
雖然卿姐同記者講，暫時未有意欲申請回鄉証返內地，不過由建制最大黨主席同反對派最大黨前主席一齊返鄉下，真係諗下都覺得過癮，分分鐘好睇過曾鈺成同長毛跟着矛盾去旅行呀！
