青年新政梁頌恆、游蕙禎終於唔再係立法會議員，今日《壹周刊》就出咗「梁游已完」嘅專訪，唔再講埋啲假大空嘅「港獨」大計。梁頌恆喺專訪提到，形容自己係商人與政治人之間，較似一個商人，又話自己好功利。畢業係城大工商管理系嘅佢，自誇做學生會會長嗰陣賺咗一百二十萬，而自己好功利嘅。
但點解佢唔做「商業奇才」，反而做「政治庸才」?佢話呢個都係好功利嘅諗法，因為唔想要一國一制「一國兩制」又唔得，所以無咩選擇。自己亦都唔會再北上，因為覺得生命受威脅，仲話自己入青政之後，買咗保險，被人暗殺應該有得賠三百萬喎。
睇咁多個梁生專訪，呢篇真係笑死。梁生係咪睇得太多電影呀?拍緊《十月圍城2》呀? 「被人暗殺」都講得出，你當香港係一個咩地方呢? 定係之前喺辦公室玩得太多《Assassin's Creed》呢?仲有，好功利呢個講法真係搵邊個信你呢?刻意要破壞目前嘅「一國兩制」，搞「公投自決」，搞「港獨」，真係完全睇唔透。
