圖：新書序言由香港特區首任行政長官董建華撰寫
國家主席習近平視察香港三天，令香港慶祝回歸二十周年嘅氣氛更加熱烈。話時話，二十年前回歸嘅情景係點呢？當年解放軍駐港部隊又點樣喺1997年7月1日凌晨零時從英軍手上接管香港防務呢？
如果有親歷其境嘅朋友親述當年種種，你話幾好呢？啱啦，真係有七十幾位歷史見證人，寫低佢哋親歷、親見、親聞嘅回歸故事。呢本新鮮出爐嘅書就係《紫荊花開映香江》喇，序言由香港特區首任行政長官董建華撰寫。
時任深圳警備政委曹紹業就憶述咗當年駐港部隊分兩批四路入境嘅情形。佢仲講咗段小插曲，空軍直升機部隊原定由廣州直飛香港，由於天降暴雨，經請示總部而調整至7月1日早晨八點起飛入香港。
鄭晴愈睇愈過癮，原來多位中聯辦前領導都有撰文呀。講過「香港是一本很難讀懂的書」嘅姜恩柱，細述「新華社香港分社」點樣喺2000年1月18日更名為「中央人民政府駐香港特別行政區聯絡辦公室」嘅來龍去脈，而呢位新華社香港分社社長嘅身份，亦改為中聯辦首任主任啦。
中聯辦首任副主任之一嘅王鳳超都有撰文《我所見證的七份中英外交函件》。書中爆料，回歸前一年，末代港督彭定康先至公開承認「他的顧問」睇過七封函件，而彭定康自己竟然無睇過，難怪王鳳超都話費解。講開又講，王鳳超啱啱出咗本《香港政制發展歷程（1843-2015）》，真係一份送畀香港嘅好有心同好有意義嘅回歸禮物。
