圖：林鄭月娥（右四）、林雄（左四）、林武（右三）、朱偉（左三）、宋如安（左一）、鄧祐才（左二）與其他嘉賓為「2016香港．佛山節」開幕

　　「咚咚鏘，咚咚咚鏘」，中環遮打花園呢幾日開「武林大會」，英雄雲集舞獅、表演詠春，仲有剪紙、紮作等傳統表演。咦，好香呀，原來係佛山特色小食，行過聞到都忍唔住流曬口水！

　　原來由尋日起，一連四日喺遮打花園舉辦首屆「佛山節」。政務司司長林鄭月娥、中聯辦副主任林武、廣東省委常委、統戰部部長林雄、外交部駐港特派員公署副特派員宋如安、佛山市市長朱偉、香港廣東社團總會主席陳永棋等名人，尋日齊齊出席開幕活動。林鄭致辭時話，希望港佛兩地加強交流，不單止香港人到當地投資發展，佛山嘅企業，亦可以藉香港金融系統及開放營商環境，走出國際，兩地有互助互補關係。

　　唔講唔知，面對佛山五區嘅特色美食，林鄭都被吸引，開幕禮結束後，即場試咗唔少美食。好似禪城嘅「盲公餅」、「石灣玉冰燒」，三水嘅「馬仔」、「蛋散」，順德嘅「大良崩沙」、「均安廣業蒸豬」等，尤其係順德「倫教糕」，佢好似試咗幾嚿添。

　　鄭晴仲喺現場見到唔少老友記，立法會議員林健鋒、馬逢國、葉國謙、葉劉淑儀、容海恩同麥美娟，睇嚟佛山文化真係吸引到唔少人。佛山社團總會主席鄧祐才仲同鄭晴講，今次活動用咗兩、三個月籌備，時間匆忙，仲有好多佛山傳統藝術未能夠喺香港展示，希望以後每年都嚟香港搞「佛山節」，令大家更多了解呢個嶺南古城嘅魅力咁話。