當一啲無法預測嘅重大事件一旦發生，會有好大影響力，就係所謂「黑天鵝效應」，例子除咗有英國脫歐，當然唔少得美國共和黨特朗普成功勝出美國大選。正當外界對「狂人」勝選對環球經濟有咩影響而議論紛紛，金融界立法會議員陳振英就洞悉先機，喺大選前修訂自己嘅公積金投資計劃，避過近日嘅股市波動。
陳振英話，自己一直將公積金投資響保守或者有保證回報嘅基金，幾年前開始，改為投資美國同中國嘅股票基金。兩個禮拜前，朋友話佢知，十月股市通常下跌，加上美國大選選情唔明朗，佢於是決定將資金轉去保守基金。
大選結果一出，特朗普成功當選下任美國總統，觸發環球股市波動，港股前日亦不能幸免，陳振英就逃過一劫。佢話雖然唔知特朗普上任後有咩政策，但美國加息步伐添變數，目前投資取態都係傾向保守啲，觀察多一段時間，然後再作打算。
