圖：「佔中三丑」兩年前策動咗長達79日嘅非法「佔中」\資料圖片

　　「佔中三丑」中嘅戴耀廷同陳健民，尋日聯同多個大專院校講師去政府總部，報名參選角逐高教界選委。陳健民仲講到明，參選就係唔希望特首梁振英連任。戴耀廷更加唔知噏乜，竟然話參選係為咗維護香港嘅法治。

　　嚇？鄭晴無聽錯吖嘛？兩年前策動咗長達79日嘅非法「佔中」，搞到發生多次暴力衝擊，開啟呢兩年一浪接一浪嘅旺角暴亂、鳩嗚、「佔西」等等損害法治嘅「法治殺手」戴耀廷，居然仲有面提「法治」呢兩個字？唔單止係咁，立法會選舉時操盤「雷動」，搞到所謂「泛民」班人嘅布局天翻地覆，戴耀廷今次仲諗住「協調各界」，令最終有超過300人當選選委咁話。

　　淨係識得拖真係聽到厭

　　唉，舊帳未清，又想搞新嘢？講起舊帳，戴耀廷「佔中」嗰陣，實牙實齒話會公布「佔中」帳目，但事過兩年，每一次被問起都話「正在做緊」、「最快下一個月」，直到今日都唔例外，仍然係嗰句「會盡快安排」，真係聽都聽到厭。如果盤數真係無問題，唔該戴教授立即找咗條數先啦。

　　戴教授搞亂香港，搞到今時今日「港獨」勢力抬頭，新聞統籌專員馮偉光日前就撰文批評「港獨」源自學校，點知戴教授有份參與嘅呢個高教界民主行動竟然發聲明譴責，打着所謂「院校自主」同學術「自主」嘅旗號，為「港獨」思想保駕護航，香港嘅部分學生變到思想咁激進，呢班知識分子真係要負好大嘅責任啊！