-
圖：郭偉強叫埋屋企人幫自己拍片拉票/網上圖片
而家立法會候選人個個都拍片搞宣傳，唔捨得「揼本」，點樣出奇制勝？工聯會港島區立法會候選人郭偉強喺自己最新嘅宣傳片裏面，就出動埋靚靚太太同半歲大嘅仔仔一齊拍外景。阿強喺旁白度就話，家長梗係希望仔女贏在起跑線，有良好嘅成長環境。要達成呢個目標，就需要和諧共融，希望大家支持自己嘅工作咁話。其實，鄭晴睇片嘅時候都忍唔住分心；因為阿強一家大細喺片裏面和樂融融，幸福指數爆燈，咁sweet sweet嘅畫面，鄭晴嘅「單身狗」同事話，已經對佢造成咗七百萬點嘅傷害囉。
鄭晴提提你，除咗郭偉強之外，其他港島區候選名單有：張國鈞、葉劉淑儀、許智峯、陳淑莊、鄭錦滿、羅冠聰、司馬文、王維基、沈志超、詹培忠、徐子見、何秀蘭、劉嘉鴻、黃梓謙。
