-
圖：興哥話多謝當時嘅女朋友、而家嘅王太/網上圖片
工聯會尋日用實際行動同大家講清講楚，佢哋絕對唔係老餅。出選「超區」嘅王國興（興哥）將自己初出茅廬嘅故事拍成微電影，同大家分享。片裏面，講述年少嘅「興仔」所面對嘅種種挫折。佢立志入工會幫工人，但不獲屋企人理解。佢努力咁去幫畀英商無故解僱嘅工友，最後雖然贏咗官司，但因為制度不公而拎唔到任何賠償。佢日以繼夜咁返工，不過收入甚少日子艱難，女朋友（之後成為咗王太）要陪自己捱窮，次次拍拖都係捱麥包。興哥就話，付出咁多代價，換來堅守嘅「工道」，自己一啲都唔後悔。
話說呢套微電影嘅水準就算喺行內人睇來，都算得上係佳作，分鏡、對白全部都處理得可圈可點。演員更加係星光熠熠添，除咗有興哥親自上陣外，工聯會榮譽會長鄭耀棠、會長林淑儀及一眾工會老前輩都有粉墨登場。不過，興哥都好老實咁同鄭晴「吐槽」套微電影嘅缺點，就係演員着嘅衫太靚太光鮮：「我哋以前咁窮，啲衫邊有咁靚咁光鮮，不過如果着到爛身爛勢，條片就無咁好效果。所以就折衷一下，當為藝術讓步啦。」
鄭晴提提你，區議會（第二）其他候選人名單包括：李慧琼、周浩鼎、陳琬琛、梁耀忠、塗謹申、鄺俊宇、關永業、何啟明。
