首頁 > 港聞 > 正文

小豹律蛺蝶重現江湖

時間:2016-07-15 03:15:16來源:大公網

  圖:綠色力量在五月至七月期間,喺沙螺灣、䃟石灣、深屈做咗個蝴蝶調查,記錄咗84種蝴蝶/綠色力量提供

  尋日係「全城愛蝶日」,綠色力量公開招募「蝴蝶大使」,教授市民辨認蝴蝶,年滿九歲即可報名。鄭晴還見到之前綠色力量請咗行會成員陳智思(Bernard)做「蝴蝶大使」,大家都知,Bernard最擅長用塗改液做點畫,佢今次就「點」出好有型嘅黑白蝴蝶幫手宣傳。

  咁香港邊度蝴蝶最多啊?鄭晴聽講,香港有260種蝴蝶物種,近80%物種於大嶼山的蝴蝶熱點出現。綠色力量在五月至七月期間,就係沙螺灣、䃟石灣、深屈做咗個蝴蝶調查,記錄咗84種蝴蝶,包括兩種「非常罕見」和八種「罕見」蝴蝶。小豹律蛺蝶(Lexias pardalis)仲喺八年後重現江湖。窄紋袖弄蝶(Notocrypta paralysos)就係2012年被發現後再現。(鄭晴覺得呢兩個蝴蝶名其實真係好難讀!)

  綠色力量高級環境事務經理單家驊就話,小豹律蛺蝶一般只出現於熱帶地方如馬來西亞及沙巴等,今次發現唔係只係零星個體,而係同一時間有廿隻添,絕對唔簡單。佢相信,小豹律蛺蝶已成功喺沙螺灣、䃟石灣、深屈嘅林地繁殖,亦可能是小豹律蛺蝶喺香港最具規模嘅棲息地。單家驊指三個地方一帶屬低地林地,基本上未有發展,天然生態Keep得好好,加埋鄰近北大嶼郊野公園,形成連貫嘅高地同低地樹林環境,所以蝴蝶特別多。

  而家香港有260種蝴蝶物種,單家驊話,大嶼山有14個蝴蝶熱點,當中得五個受保護。佢就希望當局盡快將沙螺灣、石灣、深屈等「郊野公園不包括土地」納入「發展審批地區圖」,仲要快啲制訂「分區計劃大綱圖」,規管土地用途以阻止危害生態嘅發展入侵。

  鄭 晴

最新要聞

最新要聞

最受歡迎