特首林鄭月娥嘅長子林節思（Jeremy），喺媽媽競選行政長官期間瞓身支持，尋日除咗大清早就陪媽媽Set頭裝身外，亦有出席慶祝香港回歸祖國20周年大會暨香港特別行政區第五屆政府就職典禮，為媽媽「撐場」，見證媽媽宣誓就任行政長官嘅光榮時刻。
Jeremy尋日抵達會場，立即被傳媒包圍訪問，佢笑住話自己心情好興奮，亦為媽媽感到驕傲，「我明白呢份並唔係一份容易嘅工作，我會盡量支持佢，希望佢能夠成功團結社會，帶領香港再創高峰。」佢深信，媽媽一定會盡力化解香港社會矛盾。
目前喺北京、內地手機公司「小米」任職嘅Jeremy話，支持媽媽嘅方法，就係多啲陪佢，即使自己要到北京工作，以後都會多啲打電話畀媽媽。
