行政長官林鄭月娥（Carrie）尋日宣誓就任，成為第一位香港女特首，佢為咗同市民加強聯繫溝通，上任首日即開咗Facebook專頁同Instagram，第一個「剪綵」post上載咗啲乜？係佢尋日清晨五點半起身，為宣誓「裝身」嘅片段，分享佢嘅心情。鄭晴發現，Carrie近日頻頻換新裝，單係尋日，由宣誓就職、到送國家主席習近平上機等等，全日起碼換咗四個Look。

　　「林鄭月娥 Carrie Lam」Facebook專頁、「carrielam.hksar」Instagram帳戶開張大吉，首個發帖「晨早五點半約了髮型師，整『妝』待發，迎接更美好的將來～」，兼有hashtag「第五任行政長官」、「宣誓就職」。片段中，Carrie喺髮型屋「Set頭」、化妝，大仔林節思陪伴身邊，十分孝順。

　　開放留言 方便溝通

　　短片中，Carrie除低眼鏡錄影，佢話過去六個月，由一月宣布辭職競選特首後，發生好多事，到尋日宣誓就職嘅重大日子，佢反而覺得較輕鬆。未來五年，佢肩負重要責任，有信心喺大家支持下，同新政府為大家帶來更美好將來。Carrie第二個發帖，係宣誓就職誓詞。而佢嘅Facebook係開放畀市民留言。

　　講返造型，Carrie尋日出席升旗禮時穿着鮮紅外套搭彩花旗袍，就職典禮時已換上淡粉色旗袍配白色薄紗外套；視察港珠澳大橋工程時，又再換Look；送習主席上機時，就換上白色西裝外套配淺啡花紋旗袍。數數下，唔夠八個鐘就換咗四個造型。

　　咪以為Carrie只係衣着講究，用乜手袋一樣好有心思，鄭晴收到風，佢尋晚睇慶回歸煙花匯演時用嘅紅色手袋，係NGO「愛連心」嘅出品，呢個機構專門回收領帶，由本地藝術家設計唔同款式手袋，然後訓練基層婦女縫紉，基層婦女每做好一個合格產品都會有收入，非常有意義！Carrie帶住佢睇煙花，反映出佢記掛基層嘅心。

　　鄭晴