保險界立法會議員陳健波(波哥)最近開設Facebook專頁,仲有波哥投資台、波哥保健台、波哥時事台各式頻道,教你點投資買樓等,希望同更多市民「網絡全接觸」,好多網民都話睇完學到嘢!
波哥話,呢個意念係助理諗出嚟嘅,希望好似「大台」咁有多個Channel播唔同類型節目,仲請到「大台」前記者幫佢做旁白㗎!幾條片出街後,暫時竟然係「保健台」教點樣沖杞子水最受歡迎喎!佢仲講,遲嚇希望出啲有關青年問題嘅短片,探討時下青年有咩出路喎。
鄭晴就覺得,波哥可以多啲出鏡,仲應該分享嚇佢做財委會主席面對反對派「拉布」嘅感受啦!波哥話可以考慮,仲即時大呻而家反對派就「問責官員加薪」議案拉布,雖然距離農曆年假前仲有四節共八小時嘅會議,但咁嘅勢頭,睇怕要拖到過年後先可以表決。所以話,反對派真係好識點樣浪費時間。