大公產品

首頁 > 港聞 > 正文

旺暴受傷警長未康復 EQ曬合照讚正能量\鄭晴

時間:2016-10-25 03:15:14來源:大公網

  圖:EQ(右)同喺旺角暴亂中受傷嘅警長黃樂安合照\網上圖片

  今年大年初一發生嘅旺角暴亂,相信廣大市民仲記憶猶新。部分執勤期間受傷嘅警務人員,到依家都未能夠完全康復,包括被暴徒掟磚襲擊嘅警長黃樂安。民建聯葛珮帆(EQ)早前出席活動時就遇到黃警長,事後仲喺Facebook分享與對方嘅合照同埋近況添。

  鬧爆梁天琦

  EQ話,黃警長做咗好多次手術,到依家都仲要每星期做幾次物理治療,半邊身體可能以後都會痛,左手亦未必能夠完全康復,不過都好希望能盡快復工服務市民。

  面對社會吹起「港獨」歪風,EQ大讚黃警長充滿正能量之餘,亦都提到有份指揮暴動嘅本土民主前線梁天琦,事後話搞「港獨」革命抗爭無底線,仲搵咗青年新政梁頌恆同游蕙禎代佢選立法會。佢批評,梁同游竟然利用立法會宣誓嘅莊嚴儀式,公然用粗言穢語侮辱祖國同中國人,惹起公憤;又反問市民係咪要繼續縱容暴力同埋無知「港獨」者為所欲為,姑息養奸破壞香港。相信唔少香港人見到最近立法會發生嘅亂局,都會好似EQ一樣咁勞氣喇。

最新要聞

最新要聞

最受歡迎