圖：容海恩 Eunice Yung

　　仲有三日就到立法會選舉投票喇，候選人都使出渾身解數去拉票。新民黨主席葉劉淑儀同常務副主席田北辰，尋日都為該黨嘅立法會新界東候選人容海恩（Eunice）拍片，呼籲市民支持佢。葉太就話Eunice係一位政壇新人，雖然佢唇槍舌劍比不上其他人，但身為一個青年專業人士，有能力、有專業知識，佢加入立法會，可加強立法會處理草案條例嘅能力；田北辰就稱讚Eunice面對攻擊、壓力，仍然維持真我個性，勇往直前，那份堅毅不屈、永不言敗、永不放棄、永不氣餒，值得肯定。

　　投票予實事求是候選人

　　近排多位社會名人都拍片力撐Eunice，例如藝人鄺美雲就大讚Eunice個性友善，經常面帶笑容，又好有熱誠為社會服務，可以為香港帶來正能量；香港華人基督教聯會真道書院校長曹希銓亦欣賞Eunice支持婚姻應該係一夫一妻，一生一世嘅立場；律師陳世強亦支持本身係大律師嘅Eunice，仲稱讚佢有獨立思想同廣博學識嘅專業人士，市民投票就應該選實事求是嘅人，而唔係選一啲只為個人利益或政治理想，而犧牲香港整體發展嘅人入議會。

　　新界東候選人名單仲有葛珮帆、陳克勤、鄧家彪、李梓敬、方國珊、林卓廷、楊岳橋、張超雄、范國威、侯志強、梁國雄、陳志全、麥嘉晉、廖添誠、黃琛喻、鄭家富、陳雲根、陳玉娥、李偲嫣、梁頌恆、梁金成。葉太係港島區候選人，其他名單仲有張國鈞、郭偉強、許智峯、陳淑莊、鄭錦滿、羅冠聰、司馬文、王維基、沈志超、詹培忠、徐子見、何秀蘭、劉嘉鴻、黃梓謙；田北辰是新界西候選人，其他名單仲有梁志祥、陳恒鑌、麥美娟、周永勤、何君堯、尹兆堅、郭家麒、黃俊傑、馮檢基、黃潤達、朱凱迪、黃浩銘、李卓人、湯詠芝、張慧晶、高志輝、鄭松泰、呂智恆、鄺官穩。