林顥伊（左）同影星麥長青(麥包)合作炮製「包有衣食炒飯」
大公網5月30日訊 今日係端午節，不過其實除咗扒龍舟同食糉，亦都有其他活動可以參與!有團體就搞咗個比賽，俾家長同子女一齊下廚享天倫之樂，活動亦響應政府推廣低鹽、低糖嘅飲食概念。
出名「為食」嘅食物及衞生局局長高永文(高醫生)除咗做主禮嘉賓，今日更親自下廚參加友誼賽。佢話自己平時好少有機會煮食，不過為咗令家傳嘅特色潮州菜唔好失傳，就跟屋企學咗兩味，佢最鍾意就係高爸爸煮嘅「燜冬筍」。高醫生喺比賽入面同拍檔合作煮蛋包飯，評判食完之後話，高醫生嘅飯符合三低，落鹽唔多，所以食落特別舒服健康。
經民聯青委副主席林顥伊都有參賽，顥伊話自己以前喺美國讀書嘅時候多啲下廚，返香港後都會同嫲嫲、婆婆煮下中菜，同婆婆一齊下廚嗰陣會煮佢家鄉嘅台灣菜，好似炒豆腐乾同煎蛋餅咁，聽到鄭晴都流曬口水!
