香港回歸祖國已經20年喇，香港內部事務應該按「一國兩制」嘅原則去處理，但係總有一啲人唔肯接受呢個事實，經常跑到英美等國「搖尾乞憐」，香港眾志秘書長黃之鋒呢排就去咗英國倫敦「唱衰香港」，仲同包括前港督衛奕信（Lord Wilson）、喺香港主權移交前夕擔任英國外交大臣嘅聶偉敬（Sir Malcolm Rifkind）等當地政界人士會面。
衛奕信質疑反對派否決政改
不過兩位英國老人家，就好似唔當黃之鋒講嘅嘢係一回事，連黃之鋒都喺社交網站呻，喺香港民主進程嘅課題上，同兩人有相當程度嘅分歧，例如衛奕信就質疑香港反對派點解否決2017年政改方案，令市民錯失一人一票選特首嘅機會，黃之鋒此行真係嘥氣嘥心機。話說黃之鋒之後又會同另一個過氣嘅前港督、出名「反中亂港」嘅彭定康見面，仲記得肥彭早前嚟香港，仲批評過「自決派」其實是搞「港獨」，講自決只是玩「文字遊戲」，預計兩人見面都係各說各話，黃之鋒不如早啲收工返香港罷啦。
