香港人成日為兩餐，好少可以同仔女有親子活動，既係一個「好」嘅爸爸，又係勞工及福利局局長嘅蕭偉強，尋日出席活動個時就話，自己好重視和珍惜與家人相處和共同成長的時光，仲會一齊討論時事同睇電視，鄭晴就好好奇，唔知局長會唔會同仔女討論強積金對沖㗎呢？
話說工聯會尋日就舉辦「全港兒童繪畫比賽」頒獎典禮暨得獎作品展覽，今次比賽就鼓勵小朋友，畫出佢哋心目中理想嘅親子活動，既發掘小朋友嘅創意同心思，亦可以宣揚親子樂、工作生活平衡和同家庭友善嘅僱傭措施。
有一仔一女嘅蕭局長尋日出席做嘉賓，一向低調嘅佢，仲拋磚引玉，大談同家人相處情況。佢話，記得佢仔女細細個嘅時候，佢非常享受陪子女睇消閒書、睇電視，甚至討論時事添。 佢仲話同仔女一齊分享、一起成長，往往係最能夠培養感情。
到咗今時今日，仔女都大個，有自己朋友圈子，但蕭局長仍然繼續做佢哋「老死」，不時談天說地，講嚇東講嚇西，交流對唔同事物嘅睇法，一方面讓畀自己了解仔女同青年人嘅想法，同時又可以加強自己同佢哋聯繫，認真一舉兩得。
