俗稱「G5」的立法會五人組，尋日舉行新春傳媒茶敘，同大家拜年。保險界議員、財委會主席陳健波（波哥）早排開咗facebook專頁，玩facebook玩上癮，不時講嚇樓市、強積金和健康之道，大受網民歡迎。波哥同鄭晴講，遲啲都好想將自己嘅人生經歷分享嚇，包括教育和婚姻，希望唔同嘅人都有所得着。波哥喺facebook嘅樓市專題，前日去到第三集，今次就講點樣「對抗息魔」。波哥話，供緊樓嘅朋友如果早有準備，就算加息都唔使咁頭痕，佢又醒咗幾招畀大家，例如年期唔好借咁盡，儲蓄到一定嘅金額，可以考慮還返畀銀行。
