天文台尋日午後事先張揚會掛八號波，之不過，暴風雨前夕總係最平靜嘅，大雨未嚟之前，香港嘅天氣異常晴朗。鄭晴喺鰂魚涌望完天，再望返地面，咦，唔係眼花嘛？竟然見到大黃蜂，仲綁住喺有柯柏文顏色同博派logo嘅貨車上面？根據鄭晴目測，大黃蜂身高兩米半，架博派貨車亦有約六米長。唔通好似上一集咁，又嚟鰂魚涌取景？
變形金剛迷注意嘞，嚟緊呢個星期，大黃蜂會巡遊全港各地。今日下晝三至七，會入上水、粉嶺；聽日下晝三至七，就現身灣仔、中環；星期四同樣時間，轉場去沙田、荃灣；星期五就去銅鑼灣同尖東逛番轉。至於星期六，朝十晚六空降尖沙咀同旺角；星期日同樣時間，大黃蜂就殺入元朗、屯門。
不過，鄭晴比較關心嘅係，大黃蜂咁堅，應該唔怕打風啩！
