工業界(第二)立法會議員吳永嘉(Jimmy)除咗出名鍾意飲返兩杯,亦都係一名食家,隨口可以講出一味地道菜式煮法與出處,但原來佢最怕就係入廚房!
Jimmy話,十幾年前曾經喺屋企想用爐頭烘乾一個洗完嘅煲時,掛住睇電視,一唔留神就燒着咗個煲,差啲釀成火災,自此之後,佢已經廿幾年無煮嘢食,連煎蛋都唔會,最多只係煮嚇即食麵。
唔煮嘢食,至少要幫手洗碗補數?但原來一樣唔使。Jimmy後生時,曾經整親腰骨,有一節脊骨移位,條腰無辦法長期維持同一個動作,所以佢有大條道理碗都唔洗。
Jimmy仲話,佢曾經有一段時間獨居,因為一直無用廚房,當有人嚟睇樓時,成個廚房仲係原封不動新簇簇,個單位都因為咁而特別受歡迎。