特首選舉提名期下星期一就開始，現時四名熱門參選人中有一半是女性，名副其實「撐起半邊天」，各方預計今屆選舉出現香港首位女特首嘅機會都唔細。鄭晴聽聞，警方正密鑼緊鼓咁籌備緊特首選舉嘅保安工作，由參選人正式入閘成為候選人嘅一刻起，以至當選成為候任特首，俗稱G4嘅要員保護組人員都會提供24小時貼身保護，因應今屆嘅情況，據聞警隊正搵緊一啲受過G4訓練嘅Madam，為可能出現嘅女特首提供保護，同時內部正物色緊下任特首副官嘅人選。
訓練有素女警不缺
警隊中人向鄭晴講，由於不時有女性外國政要訪港，G4一向有訓練足夠數量嘅女警，唔需要額外訓練多一批女警加入G4，佢哋都有研究過外地女性領導人嘅保安規格，發現近身唔一定係女性佔多，例如德國總理默克爾，身邊主要都係由彪形大漢，再者，其實歷屆候選人唔少主動婉拒警方保護，唔係人人都想被24小時跟出跟入，無曬私人空間。講到底，最終安排要視乎邊個當選、到時風險評估、實際需要以及特首嘅個人意願，具體嘅保安布局係點就當然不能公開。
