日日運動身體好，政府為咗推廣體育「普及化」，嚟緊喺四月起將舉辦第六屆全港運動會！民政事務局局長劉江華尋日喺誓師大會上呼籲，市民除咗為健兒打氣外，仲應該身體力行，參加各項社區參與活動。無論你想強身健體，抑或瘦身減肥，係時候郁一郁！
今屆港運會喺嚟緊4月23至5月28日舉行，盛事除咗田徑、羽毛球、籃球、五人足球、游泳、乒乓球、網球及排球八個項目外，仲首次增設智障人士游泳邀請賽同輪椅籃球挑戰賽，讓殘疾人士一齊參與其中。
劉華局長話，港運會不單只為超過3200名的業餘運動員提供盡顯潛能的大好機會，仲可以提升市民對居住地區的歸屬感，加強社區凝聚力，寄語各位健兒喺各項賽事中全力以赴，爭取佳績！
