大公網3月2日訊 因為佔領行動期間備受重大壓力，加上挑釁而不當對待被捕人士嘅七位警員早前被法庭判囚兩年，而家正在上訴當中。民建聯立法會議員蔣麗芸（Ann姐）尋日就喺立法會提口頭質詢話，有意見指出，有唔少參與佔領運動嘅年輕人係為咗追求理想而誤墮法網，亦有小部分執法人員因為被挑釁而被定罪，問政府會唔會考慮按《基本法》授權行政長官嘅權力，考慮特赦或者減免部分人嘅刑罰。
除咗Ann姐，民建聯主席李慧琼（Starry）、同屬民建聯嘅葛珮帆（EQ）同經民聯嘅梁美芬（Pricilla）等建制派議員都有發言希望政府考慮特赦，為相關人士求情。
不過，保安局局長黎棟國就解釋，行政長官嘅特赦權力同特赦方式自回歸後有所改變，同以前港督按英皇制誥嘅特赦唔同。現時行政長官分別以三種唔同方法，分別係按「長期監禁刑罰覆核委員會」的建議作出減刑的決定、由醫生認為囚犯身體條件因為唔同因素不宜收監、或者在囚人士向行政長官提出呈請獲得接納。
黎棟國話，行政長官會就每宗個案獨立作出審慎詳細考慮，另外，七名警員而家已經全部上訴，喺所有司法程序未完結之前，政府唔會就個別案件作出評論，行政長官亦唔會行使赦免或減輕刑事罪犯的刑罰的職權。
