圖：Dr. Lo（左三）希望出席者交流養寵物心得/受訪者供圖
經民聯尋日喺林村許願廣場舉辦「動物許願節2017」，主席盧偉國（Dr. Lo）致辭話，今次主辦係希望宣揚愛護動物、支持領養嘅信息，而經民聯非常重視生物多樣化，認為發展同保育可以平衡。咁到底Dr. Lo有無養寵物呢？當然有啦，不過唔係狗仔，係錦鯉，由當年「魚毛」養到而家半米長，佢好開心，希望大家可以盡興，又希望互相交流養寵物嘅心得。
經民聯副主席梁美芬（Priscilla）就話，自己都係寵物愛好者，細個見到有流浪狗，都唔忍心見到狗狗喺街流浪，於是帶返屋企養。起初爸爸好反對，但過咗一、兩星期之後，就終於成為家庭愛錫一分子。六年前，Priscilla兩個仔當時仲細，但佢哋話，希望可以喺屋企養狗，Priscilla最後都係滿足咗仔仔嘅願望。Priscilla仲話，隻狗仔叫Curtis，見到朋友會好熱情，又會為屋企帶嚟歡樂，認為狗仔可以治療唔開心嘅朋友添。
