圖：EQ考慮就鄭松泰誣衊懲教一事提出譴責動議
「熱血公民」立法會議員鄭松泰早排喺議事廳倒插國旗辱國，已經惹來全城憤慨，謝偉俊仲因此提咗譴責動議。一波未平一波又起，鄭松泰近日又再出事，誣衊懲教虐囚，仲死撐自己無錯唔肯道歉，事件令好多懲教職員都深感冤屈。民建聯立法會議員葛珮帆（EQ）尋日同傳媒聚餐時就話，收到有關投訴，考慮就鄭誣衊懲教一事提出譴責動議，「議員一言一行都受公眾關注，鄭松泰嘅講法係令懲教署聲譽受損，佢絕對需要出來道歉！」
EQ話，懲教事務職員協會曾經就事件向立法會主席梁君彥發信，要求在議員利益申報委員會處理鄭松泰發表失實言論，但主席因事件唔涉及議員個人利益而拒絕。佢質問：「點解屈完人可以一句交代都無？」認為點都應該為眾懲教人員取回公道，打算以行為不檢為由，向內務委員會提出譴責動議，初步已通知幾位建制派議員，又指如果鄭立即就此道歉，會考慮撤回動議。
不過，呢位鄭議員似乎毫無悔意，仲喺Facebook專頁上話代議士監察政府施政，要求政府公平、公正、透明是議員本職，「沒有必要回應事件」。大家都係姓鄭，鄭晴喺度奉勸鄭議員一句，自己跟車太貼撞咗車，就無謂死撐啦。
