圖：曾俊華親自打電話畀喺fb留過言嘅市民，不過有市民好似唔係咁受落/曾俊華fb截圖

　　行政長官選舉參選人曾俊華（鬍鬚），尋日喺facebook貼出新拍嘅片段，佢喺片中大玩親民騷，親自打電話畀留過言嘅市民。不過有市民就好似唔係咁受落啦，例如有位「陳小姐」，聽到鬍鬚話自己係曾俊華時，就好疑惑咁問：「做乜嘢㗎？」當鬍鬚再次表明身份，「陳小姐」就急忙話「唔使啦，唔該，唔使啦，唔該」，然後Cut線。不過鬍鬚都成功打畀過一位叫「Karen」嘅女士，兩人討論起教育政策。其實都好難怪市民請鬍鬚食檸檬嘅，因為而家電話騙案咁多，騙徒手法層出不窮，市民提防係理所當然。

　　網民話私訊唔覆

　　新片一出，唔少網民都喺下面留言，很多都係讚鬍鬚嘅公關點勁點強，但都有網民「溫馨提示」鬍鬚從未回覆佢，例如「Karl Siu」就話：「我之前已經PM過你（鬍鬚），亦send過email畀你，但你以至你整個團隊一直都無回覆，請問你幾時方便回覆呢？」

　　特首提名期尋日已經展開喇，邊個夠票，邊個唔夠票，真係真假消息漫天飛。近排鬍鬚陣營及反對派入面都傳出，胡國興已夠提名票，希望反對派能轉為提名曾俊華，不過胡官已經反駁呢個說法係假嘅，佢哋仍要努力爭取提名。

　　鄭 晴