圖：蘇錦樑（中）同馬逢國（右）都有出戰「渣馬」/大公報記者張月琪攝

　　尋日六萬幾人一齊跑的盛事「渣馬」，商經局局長蘇錦樑同立法會議員馬逢國都有出戰。蘇局長話佢對上一次跑，已經係一隻手都數唔曬嘅事，係六年前喇！今次「復出」嘅成績，佢話都可以接受，但最重要係要宣傳本地運動品牌，佢仲着埋上身，身體力行，十足十代言人咁款。

　　蘇：有人話我瘦咗

　　話說工業總會之前就將首個香港聯乘品牌MOZACCO亮相，超過五十位工總領導同會員跑手，都喺馬拉松10K、半馬及全馬比賽入面，着呢款運動裝備，就連蘇局長都畀面撐，仲好hard sell，不斷介紹件衫着得幾舒服。蘇局長又話，覺得今年成績好過六年前跑嗰次，主要係今次天氣比較好。

　　馬：立會跑步機操練

　　咁佢又係點備戰嘅呢？原來佢通常會跑寶雲道一帶，仲講笑話自己練跑後，「有人話我瘦咗」，尤其美食車開咗後，佢成日試食，就更加要跑步添。

　　訪問期間，馬逢國剛剛就到達，仲即刻同蘇局長拍膊頭。馬逢國今年都係玩10K，原本目標就係一個鐘搞掂，不過而家應該一個鐘頭十零分鐘。佢話自己平時其實冇認真備戰，「立法會『拉布』嗰時咪走上立法會五樓common room跑步機跑下咁囉」，實行跑步抗「拉布」，高招！三星期前，馬議員仲移師到跑馬地球場練習，雖然操得咁fit，不過佢就話未有打算跑半馬。

　　鄭晴