梁福元用自己種嘅金茶花沖養生花茶
大公網2月10日訊 十八鄉鄉事委員會主席梁福元今日同傳媒團拜，鄭晴都有去湊嚇熱鬧。大棠村青年團嘅舞獅隊首先表演採青，不過就搞搞新意思，獅子將地上象徵「招財」嘅香蕉、生菜同象徵「陸續有來」嘅碌柚擺成「盤滿砵滿」送畀梁福元，真係又有創意，又好好意頭！
梁福元接過舞獅送畀佢嘅「盤滿砵滿」
梁福元之後請鄭晴飲佢自己喺屋企種嘅金茶花沖嘅茶，梁福元話金茶花有「植物界嘅大熊貓」之稱，專家仲話佢嘅藥用價值好高，甚至可以用嚟抗癌，市面都賣緊差唔多十蚊一朵。梁福元嘅屋企會自動定時抽魚池嘅水灌溉，當中嘅魚糞仲可以當做肥料，係一個好有效率嘅環保系統。另外梁福元嘅沖茶機亦都識自動裝水，屋內嘅熱水爐靠屋頂嘅太陽能板充能，係相當高科技嘅智能家居。
梁福元「一馬當先」騎上駿馬散步
同大家傾傾嚇，有人騎住梁福元馬房嘅馬經過，梁福元話自己有時巡視業務都會騎馬，因為騎馬快啲同可以上去車去唔到嘅地方。話口未完，梁福元就騎咗上馬背行咗一圈畀大家睇，相當威風。佢話，原來當初都係學識咗騎馬先考慮開馬房，不過自己就鍾意騎馬多過賽馬。
