大公產品

首頁 > 产品 > 港东港西 > 正文

新手媽林恬兒撐母乳餵哺

時間:2017-02-10 03:15:28來源:大公網

  圖:Emily話自己產後堅持母乳餵哺,但喺香港就真係唔敢喇

  女士地位喺社會愈嚟愈高,就連特首參選人都有兩位女士!婦女事務委員會「新丁」委員林建岳女兒林恬兒(Emily)就話要繼續大力推動女性權益,自己係「新手媽媽」,所以特別希望推廣對母乳餵哺嘅公眾教育,同埋支援基層、單親「媽媽」。講到歲半大嘅仔仔,佢仲賣關子反問鄭晴,「你估下邊個最錫BB?」畀三秒時間大家諗諗!

  唔敢喺公眾地方餵母乳

  講到邊個最錫阿仔,Emily即刻去片!打開手機條短片,「我老豆最錫佢!」片段中見到岳少好溫柔咁kiss咗孫仔一下,仲有一條片,就係岳少喺孫仔面前搖勻杯紅酒畀孫仔聞,認真搞笑!生個B仔之後,Emily又追多個B女,剛剛坐完月但已經修曬身,尋日仲同婦委會委員一齊見記者。Emily仲分享兩個小朋友嘅「裸照」畀鄭晴睇,真係好趣致㗎!

  Emily話自己產後堅持母乳餵哺,第一胎仲餵咗成年添,不過喺英國長大嘅佢講到,外國同香港對母乳餵哺嘅睇法好唔同,「外國好早就有母乳餵哺概念,喺公眾地方餵都放心,但香港我真係唔敢!」所以佢話好支持婦委會去做多啲公眾教育工作。

  另一位「新丁」委員,港鐵主席馬時亨女婿劉仲恆喺大半年前榮升新手爸爸,佢話太太都係母乳餵哺,又希望香港多啲便利母親嘅育嬰室,皆因佢有次想搵個地方同阿仔換片,都要等半粒鐘先用到,所以覺得要改善下。

最新要聞

最新要聞

最受歡迎