圖：睇嚟沈校長希望繼續用醫學服務社會
近期幾個行政長官選舉參選人都積極搵人加入班子，中文大學校長沈祖堯下年約滿離任，尋日咁啱中大舉辦傳媒午宴，鄭晴一見到沈校長，當然八卦下有無人邀請佢加入班子喇！沈校長聽到之後耍手兼擰頭，佢同鄭晴透露，之前的確有參選人想佢加入競選團隊，但佢因為想政治中立，又要處理手頭學校工作而拒絕。
沈校長唔肯透露邊個參選人搵佢，同做咩崗位，又唔肯講支持邊位參選人，只係不停話自己唔適合從政，暫時唔會考慮任何政治任命工作。睇嚟沈校長希望繼續用醫學服務社會，鄭晴喺度祝沈校長美夢成真喇！
想繼續用醫學服務社會嘅就唔止沈校長，鄭晴聽聞港大醫學院院長梁卓偉都係咁諗。梁卓偉話，依家五位參選人，佢識得三位，但係而家自己公職在身，冇「個人身份」，因此不應有任何政治取態，所以更加唔會公開表態或站台，仲婉拒咗所有加入參選人團隊嘅邀請。
